立法會選舉點票工作喺機場亞洲博覽館（亞博館）舉行，由於路途遙遠兼通宵點票，各大政黨同候選人都做足準備共同度過漫漫長夜，其中派出最多人參選嘅民建聯，就喺亞博館預訂咗一個會議室等結果，有政黨則計劃租車約埋一齊出發，唔使大家為咗半夜入亞博館而頭痛；另有功能界別候選人笑稱捱慣夜，會徹夜不眠等開票喎！
還記得○八年立法會選舉點票工作喺九龍灣國際展貿中心（九展）舉行，由於九展位於市區，即使點票工作要通宵進行，候選人同傳媒要休息甚至返屋企瞓一陣都好方便。不過，今次點票工作移師機場附近嘅亞博館，要搵個地方休息都唔係咁易，唔排除有候選人到機場酒店租房休息都唔定。
亞博館附近幾乎渺無人煙，我哋問過幾個較為富貴嘅候選人，佢哋都話未必會租酒店房間休息，反而係搵啲助選團成員到點票現場「人肉」報告最新點票情況，咁啲人工豈不是貴過租酒店房？不過，據講有居於港島嘅富貴候選人早前為咗晨早喺新界東擺街站拉票，特別租咗沙田區一間酒店房過夜，為咗個議席認真落重本。