用廣東話客家話呼籲
正當外界猜測發叔做「兩頭蛇」之際，佢就喺投票前一刻，為鄉事派新界東候選人邱榮光錄製一段拉票聲帶，據講仲係喺酒店廁所裏面錄音嘅添，如果真係嘅話，咁就名副其實係臨急先至嚟拉票喇，但好彩聞唔到廁所陣味。
話說發叔為咗力撐同屬經濟動力嘅黨友兼鄉事派自己人邱榮光，佢大前晚就喺尖沙咀半島酒店入面嘅男廁錄咗段拉票聲帶，仲分別用咗廣東話及客家話呼籲選民支持「原居民」邱榮光進入立法會，因為希望喺議會入面有多把屬於新界人嘅聲音，佢仲叮囑一班鄉紳快啲將段聲音播出街添。
仔細聽番段錄音，其實發叔把聲都幾清楚，唯一就係回音太大，感覺嗰度有啲空曠，莫非佢真係睇中廁所夠寧靜，啱晒錄音？