政情：港區人大變空中飛人
三十六名港區人大代表每年都會定期到內地訪問考察，暑假起行幾乎已經成為慣例，但今年適逢多名人大代表參選立法會，人大考察團惟有押後遷就。據聞最近有咗最後決定，改喺下月十一日起一連多日訪問雲南，點知呢個訪問日期原來又同新一屆立法會復會撞到應一應，唯一辦法就係暫時做「空中飛人」，喺雲南同香港兩邊走喇！
人大選舉會喺今年底舉行，據聞三十六名現任港區人大當中，至少有八人因年齡問題放棄競逐連任，如無意外今年人大考察團將會係佢哋最後一次嘅外訪活動，按慣例都會盡量爭取出席。不過，今次考察團訪問可謂一波三折，首先撞正本月立法會選舉，身兼人大嘅候選人未必可以突然行開一段長時間，所以索性稍為推遲行程。
雲南香港穿梭 兩邊兼顧
原本以為推遲咗考察團起行就會萬無一失，點知原來又同立會復會時間撞到應一應。消息話，人大考察團會喺下月十一至十九日訪問雲南，咁啱新一屆立會鐵定喺下月十日復會，除咗要選舉主席外，又會推選各個事務委員會正副主席，加上特首梁振英事前張揚會喺下月十七日出席立法會會議，同新任議員簡介新政府首三個月工作和來年工作重點，搞到身兼人大嘅議員甫履新，就要面臨他們首個痛苦嘅抉擇。
據聞三名已自動當選議員嘅人大吳亮星、廖長江等已就撞期一事取得共識，將會兼顧兩方面工作，換言之會先考察數天然後返港開會，之後可能會再出去雲南歸隊。不過，除咗上述三人外，外間預料體育、演藝、文化及出版界候選人馬逢國、工聯會九龍東候選人黃國健如無意外會當選，當選後嘅首要任務睇怕要度度點樣先可以將開會同人大考察「兩者兼得」。
話時話，其實人大因另有公務而放棄參加考察團已非首次，而考察團每四年就會撞啱一次立法會選舉，第時點樣避免撞期事件再次發生，就要考驗有關搞手嘅智慧喇！