中環出更：好奇林鄭「高」手敲銅鑼
新馬季尋日喺沙田馬場開鑼，穿上綠色碎花旗袍嘅政務司司長林鄭月娥手執鑼棍，雙手伸到直一直，姿勢似足打高爾夫球，敲響銅鑼勁度十足，為新馬季揭開序幕。到頒發特首盃時，林鄭突然對眼前嘅雕花獎盃狀甚好奇，拿上手摸完又摸，馬會主席施文信見佢咁欣賞，從旁耐心地講解盃上嘅花紋，林鄭全程專心聆聽，態度認真。
新馬季開鑼，唔少名人都入場攞番個頭彩，保良局前副主席林文燦鴻運當頭，第一場賽事就發財，佢匹靚駒「齊勝」以十五倍賠率跑出，穩袋三十多萬元獎金。保良局副主席鄭錦鐘 （Eric）及顧問局成員顏金煒都戥佢開心，齊齊拉頭馬。Eric話，老友贏馬帶挈埋佢贏錢，事關佢落重錘買重注撐老友，義氣換來大大斬獲。
利子厚夫妻甜蜜蜜
拉頭馬嘅仲有一班潮州「家己冷」，佢哋以「潮州韓江團體」名義共同擁有嘅駿駒「路路好」奪冠，獲得四十萬元獎金，雖然唔算多，但最緊要好意頭，富商陳有慶、「飼料大王」陳偉南兒子陳幼南、立法會議員林大輝等個個笑到四萬咁口。
卓妮仲見到馬會大董利子厚（Michael）同太太Munkhzul孖住入場，撐旗下愛駒「野外桃源」，雖然最後冇跑出，但無損Michael靚爆心情。卓妮見Michael對太太愛護有加，出入都輕攬纖腰，十足糖黐豆，愛妻想埋位同馬會吉祥物影相，Michael仲自動波埋位擺甫士，甜蜜指數爆燈。仁濟醫院前主席董吳玲玲都在場，佢仲帶埋孫女湊熱鬧，精靈可愛嘅孫女只得兩歲幾，已經口齒伶俐，難怪董太甜到漏，抱住孫女笑不攏嘴喇。
卓妮