香港人頭腦真係好鬼死靈活o架，一個腦筋急轉彎就可以度出錦囊妙計，財源話開即開，開到滾滾而來。之不過咁，財源滾滾未必係合法嘅，腦筋靈活唔代表奉公守法。情況就好比不少高官致富有道，但係冇人講過唔係不義之財喎。
即係咁，足浴店大家聽得多，有冇聽過足浴賓館或者足浴客棧？冇哩，咁就要講古仔嘞。
大家都知啦，香港通街都係地王，地王嘅意思係價值連城，住宅樓宇動不動過萬銀一呎，二百萬元樓下嘅豆腐膶上車盤早已消失得無影無蹤，如果你咁好彩搵到一個半個，肯定開心過發現恐龍竟然未絕種。地王無處不在反映旅客留宿係一個頭痛問題，訂房瞓覺一啲都唔容易，一係好貴，一係好細。眼見本地酒店同賓館供不應求，房間晚晚大滿貫，不少足浴店老闆靈機一動，索性大張旗鼓招呼旅客過夜覺覺豬。
好似旺角一間位於商住大廈十一樓嘅足浴店咁吖，宣傳燈箱寫到明「歡迎自由行按摩過夜」，仲有聯絡電話方便查詢添，擺明車馬經營另類賓館。記者放蛇上去明查暗訪啦，一入到去就有女店員熱情招待，一輪嘴介紹收費價目：「過夜嘅話一間房收三百蚊，有兩張床，加床就要加多一百蚊，按腳收費另計，但有半價。」如果嫌三百蚊瞓房都係貴，瞓大廳按摩椅盛惠一百蚊。
喂，過夜還過夜，按腳還按腳，兩種收費楚河漢界分得清清楚楚，你話唔係不合法經營賓館都唔得啦。執業大律師陸偉雄話呀，無牌經營旅館一經定罪，最高罰款二十萬元以及入獄兩年，如果定罪後仍然再犯，可以每日加罰兩萬元。
尖沙咀部分足浴店情況相若，分別只係房內冇提供高床軟枕，客仔要半坐半臥瞓按摩椅。
古仔講到呢度，大家可能會問一個問題，萬一唔覺意火燭點算呀？冇錯嘞，呢個係最令人擔心嘅問題，因為香港人耳熟能詳嘅係，劏房一旦失火就非常之咁大鑊。足浴店變身賓館，揼骨變成住宿，咪好似密密麻麻住滿人嘅劏房咁囉，好話唔好聽火燒後欄，旅程嘅下一站隨時係鬼門關，雖然過關免簽注啫，畀你都唔想去啦。
所以話啫，內地擴大個人遊確實要周詳計劃，須知足浴店招客過夜唔係待客之道。至於警方同消防，麻煩唔好偷懶，必須認真執法，為防火災唔能夠唔管o架。咦，梁朝新政府又話要搞好配套設施應付擴大個人遊嘅，問題係，酒店呢？賓館呢？房間呢？若然冇足夠空間接財神，唔准瞓足浴店唔通瞓天橋底咩！