今年立法會選舉參選名單創歷年新高，部分選區仲有十幾張名單，咁多選擇真係令人幾煩惱，除咗要睇議員嘅工作表現外，議員嘅投票紀錄亦係重要嘅考慮因素。如果大家覺得太難揀，最近網民就設計咗一個手機程式，羅列咗二十條由○五年至今嘅立法會重要議案，並計算出同大家理念最相似嘅候選人，就好似做心理測驗咁，但對於一啲新進嘅候選人，呢啲程式就冇咩幫助喇。
不過，今年參選人數眾多，就算睇完候選人過往嘅工作表現，相信都仲會篩剩一大班候選人，加上近排個個候選人傾巢而出告急，要做一個精明嘅選民都要講吓投票策略，例如搵埋志同道合嘅人配票。
中大政治系助理教授黃鶴回就喺facebook（fb）開發咗一個「全城配票」應用程式，方便用家平均分配選票，只要登入程式選出心儀候選人，就可以睇到身邊朋友嘅投票取向分布，從而做到配票效果。不過，配票呢個動作亦好講信任，好多人嘅fb閒閒哋都有一千幾百個朋友，網上朋友有幾可信，最後都係要靠大家自行決定。