政情：高永文囝囝 「打雀」變善舉
觀雀同「打雀」向來係環保及攝影人士喜愛嘅嗜好，食物及衞生局局長高永文嘅兒子高偉琛（Koel）就將呢種嗜好變成善舉，最近夥拍香港醫療專業人士協會創會主席江明熙醫生（Bernard）出版2013年雀鳥慈善月曆，收益用來買寒衣送贈長者，愛心爆棚。
Koel喺港大讀醫科，從小跟隨爸爸觀雀，香港有嘅大小名雀，都畀佢拍勻咁滯，於是將啲靚相公諸同好。Bernard話，五千本月曆將於九月中出爐，每本賣三十元，成功籌到十五萬元嘅話，足夠買二千件超薄保暖衣及一千個血壓計，喺聖誕送贈貧困長者，等佢哋過一個開心又暖笠笠嘅佳節。
除咗賣月曆，Bernard又義賣中秋月餅籌款，今年已係第五個年頭賣月餅。佢話印象最深係前港大醫學院院長鄧惠瓊，有年二話不說開出一張一萬元支票買月餅；而藝人胡楓、關菊英每年都低調掃慈善月餅支持，認真唔話得。