公民黨（公文袋）喺立法會選舉貪勝不知輸，香港島同新界西都話要贏兩席，仲大打告急牌，拉散晒其他泛民主派候選人嘅票源。工黨主席李卓人尋日就狠批，公文袋咁做同喺奧運跳水揀選高難度動作冇分別，一失手就要付出好大成本，分分鐘得不償失，如果泛民大敗，貪心公文袋都唔知有冇面見人喇。
喺香港島參選嘅工黨何秀蘭，亦好擔心自己成為公文袋告急嘅犧牲品，重蹈○四年選舉慘被民主黨（白鴿黨）告急拖垮嘅覆轍，佢希望香港島選民投票時忠於自己，唔好太感性，要理性睇吓候選人過去喺議會做過乜，即係擺明叫人唔好聽公文袋亂講告急。
被傳同公文袋大搞「密室政治」嘅白鴿黨都係衰貪心。民協馮檢基想喺超級選戰爭取泛民第三席，尋日仲搵到街工、工黨、公文袋及新民主同盟等人簽署同意書，支持佢贏第三席，但係偏偏白鴿黨就唔肯簽，只肯捧自己黨兩位超級區議會候選人。白鴿黨一到選舉就六親不認，睇嚟泛民團結，都係得個講字。