政情：麥美娟嫻姐 爆友黨鎅票招數
建制派喺立法會選舉競爭激烈，鎅票報道同消息不斷，好似工聯會近日就全面告急，各候選人都嗌晒救命畀「自己人」鎅票，其中新界西嘅麥美娟（Alice）尋日搵埋工聯會榮譽會長鄭耀棠出嚟拉票，選情似乎好嚴峻喎。
之前Alice已經講過幾次被友黨鎅票，佢尋日透露鎅票手法，話某位對手不斷打電話畀工聯會會員，訛稱Alice已經夠票，呼籲佢哋投畀另一個同工聯會友好嘅候選人；當班會員話想投番畀Alice時，對手就會退一步叫班會員同家人自行配票，總之鎅得一票得一票。
嫻姐製「分身」
咪以為只有Alice畀人鎅，就連超級區議會候選人陳婉嫻都畀人搞。
嫻姐尋日怒斥對手講大話，係咁屈工聯會夠票，又話咁做令選民好徬徨，唔知投邊個好。為咗壯聲勢，嫻姐特製咗五支自己肖像嘅公仔棒出嚟，選舉當日當做分身去拉票，佢重申，工聯會絕對唔夠票，呼籲會員咪信流言喎。