中環出更：退休甜湯做跟得男友
香港人壽命長，但係快樂指數排名甚低。提升快樂指數基金主席吳宏斌有妙計，佢話身體健康咗，快樂指數自然高，日前仲請來老人科專科權威佘達明醫生開講。佘醫生話，最新醫學研究顯示，七十歲以上長者體重愈輕，壽命愈短，身高體重比例（BMI）保持喺偏肥嘅廿三至廿七之間最理想。此話一出，「分量」十足嘅基金成員即時拉隊去搵好嘢食，基金義務總幹事陳詠梅（Helen）仲帶埋男友前廉政專員湯顯明（甜湯）出席添。
一班工業界老闆一講到食，好似吳宏斌同基金會長兼德國寶老闆陳國民，快樂指數直線飆升。卓妮見到Helen男友甜湯無官一身輕，得閒做吓運動、寫吓嘢，不知幾寫意。Helen瞓身為基金奔忙，甜湯就一直陪伴左右，唔講唔知，原來佢有份為快樂指數基金改名，仲獻策話要為弱勢小朋友做多啲嘢。
Helen就透露，基金快將探訪保良局嘅小朋友，兩人攜手散播快樂種子，零舍合拍。
同場仲有工業總會主席鍾志平、「耳機大王」富士高實業主席楊志雄夫婦等鐵腳，基金副主席兼中華廠商聯合會會長施榮懷、副會長吳永嘉、吳宏斌囝囝吳景瀚（Kevin）都去飲杯歡聚。
吳宏斌囝囝 出外闖蕩
最近Kevin被「新金王」黃英豪羅致出任金至尊企業拓展部總監，卓妮見佢講起新工作，幹勁十足，難怪爸爸吳宏斌都好支持佢外出闖蕩，家族生意就交由大仔去打理喇！
卓妮