旺角花園街排檔連續兩年火燒連環攤，四級大火嘅無情火舌更加殃及街坊街里嘅唐樓劏房，舊年就釀成九死慘劇，真係好冇陰功o架。新官上任嘅食物及衞生局局長高永文，尋日就巡視咗北角街市同佐敦寶靈街街市小販區，了解固定小販攤檔嘅運作同困難。
局長出巡有冇體察民情呀？哈，罕見喎，係有喎，高永文講咗一套改善小販攤檔防火安全嘅大計，涉及金額大拿拿二億元。港九新界販商社團聯合會主席鄭素娥講得好頂癮，佢對於防火撥款表示歡迎咁話：「之前畀咗錢都冇辦法，鬼叫當時冇高永文。」言下之意即係話，舊時嗰個爛鬼局長周一嶽冇料到，惟有高永文取而代之先至有令人欣喜嘅新措施。
高局長嘅構思係咁嘅，為全港四十三個固定小販區嘅四千個攤檔提供津貼作為誘因，優化環境主要係三大方向。第一，如果攤檔原址改裝，政府會因應不同貨品喺設計上提供指引同資助，包括建議採用邊種防火物料。第二，接近大廈樓梯口嘅攤檔如果有必要搬遷，局方會提供津貼。第三，部分檔主若然選擇放棄經營，可以得到一次性津貼，鼓勵相信係年紀老邁嘅小販交回牌照。鄭素娥就話嘞，希望自願退牌計劃出手闊綽少少，等老人家有足夠資本安享晚年。
高永文預計，相關計劃耗時六至八個月詳細規劃，必須向區議會諮詢，又要向立法會財委會申請撥款。如今粗略估計需要二億元，五年後達到最終目的。
聽落去係咪唔錯呢？防火有津貼，搬遷有津貼，連執笠都有津貼，花園街排檔奪命大火嘅歷史有望唔會重演。之不過咁，九七回歸之後嘅慘痛經驗提醒大家，高官靠得住，豬乸會上樹。最經典嗰個當然係前任特首曾蔭權啦，競選承諾係「我會做好呢份工」，仲話結束任期之後希望市民記得佢係一個清官。事實係點人人有眼睇，冇做好呢份工都算嘞，竟然臨天光瀨到一褲都係，貪腐醜聞纏身搞到晚節不保。
所以計功夫茶話齋，高永文作為一位高高在上又咁啱姓高嘅高級官僚，講得出要做得到，噏得出要辦得成，否則所謂二億元改善大計再次淪為另一個假大空嘅呃鬼把戲就唔好啦。
講到九七回歸，其中一個非常美麗嘅承諾係「明天會更好」，家陣苦無立錐之地嘅蝸居一族大概要問，明天明天復明天，幾時可以住得更好？若然生活環境得以改善，花園街唐樓劏房就唔使無辜辜燒死咁多人啦！
總而言之，小販環境須改善，高官承諾須兌現，否則功夫茶會以落選特首唐英年嘅腔調指住高永文講一句：你呃人！