食衞局前局長周一鑊任內劣迹斑斑，老朽淨係知道在其無能管治下，醫療事故頻頻，前線醫護嗌晒救命，食物及藥物安全把唔到關，有毒食物充斥，私營骨灰龕亂晒大龍，假壯陽藥害死阿伯……總之，佢hea咗八年，真係唔知佢做咗乜？
最令人不齒嘅係，真正要佢理嘅，佢就搞到一鑊泡，而濫權搞針對，選擇性檢控，粗暴打壓新聞自由佢就至叻！
東方報業集團過去不斷揭露公營醫院醫療事故，屢爆黑幕，發揮監察政府功能。貪腐醜聞纏身嘅前特首煲呔曾懷恨在心，政府部門以各種藉口滋擾東方，周一鑊更充當頭號打手，隨便一句「接獲投訴」就高調派員到東方調查，無事生非，公器迫害正義傳媒，令人髮指！
猶幸讀者眼睛係雪亮的，本報民調反映受訪者均不值其濫權搞針對所為，市民甚至話要追究到底，要佢向東方道歉，還東方清白！
之不過以周一鑊「錯完可以再錯，再錯唔怕更錯」嘅性格，想佢認錯道歉，肯定比拉牛上樹更有難度！不過，呢個世界真係無絕對，港大竟頒個名譽大學院士銜畀佢，以表揚佢對社會嘅「貢獻」！
每周一鑊，持之以恒，點講都係一種勇氣！至於佢濫權搞針對，深得《厚黑學》真傳，即「厚如城牆，黑如煤炭」，面皮夠厚，心又夠黑，呢個名銜屆時佢必飛身撲埋去攞！跟住笑口吟吟：「幾時頒個名譽法學博士畀我前老細曾蔭權爵士啫？」港大似乎唔明何謂「天道無親，唯德是興」的道理，說不定真係為周一鑊圓夢，若然，老朽只能唱一句：你係錯！