政情：棠哥話工聯會全線告急
民建聯鍾樹根前日踩入工聯會地頭北角，晒冷盡顯擁福建幫支持，尋日工聯會王國興就搵埋工聯會榮譽會長鄭耀棠去鍾樹根嘅根據地柴灣拉票。棠哥話工聯會選情區區都告急，目前會全力搶票，不理其他建制派生死，總之工聯會一票都不能少。
自稱祖籍福建嘅王國興竟然無福建幫撐腰，照計點都有少少失落，點知王國興信心爆棚話，早兩日喺北角拉票時，好多福建街坊都話會支持佢，仲話會有明智選擇喎。不過王國興嫌自己未夠票，尋日叫埋棠哥踩入柴灣做街站，話要四萬票至當選。咦，前日鍾樹根明明話三萬票就夠，睇嚟兩個人唔係打緊同一個算盤噃。
棠哥好老實講，現時工聯會除超級候選人陳婉嫻外，工聯會區區都告急，所以未來幾日會到唔同區幫手拉票，佢仲話今次工聯會第一次喺港島區打正旗號出選，最怕七萬名工聯會會員慣咗手勢支持民建聯，所以今次唔理咁多，點都要將工聯會支持者收歸旗下，成功喺港島插旗。