政情:民記選民投票再教育

民建聯今年喺新界西一共派出三張名單出選,好多人話,民記組織選票嘅能力咁好,配票又點會難倒佢哋吖!正當大家食住花生靜心欣賞民記配票嘅帽子戲法嘅時候,勢估唔到,前排一封疑似「誤墮他區」嘅宣傳信就搞到佢哋陣腳大亂。

其實新界西除咗譚耀宗譚Sir穩取一席有餘之外,其餘主打荃灣、葵青、東涌等區嘅陳恒鑌(Ben),同獲分配主攻元朗、天水圍嘅新界社團聯會會長梁志祥名單都選情麻麻,仲搞到要一同告急。就喺呢個時候,Ben嘅一封宣傳信唔知係咪急得滯,前幾日慌失失咁走咗入元朗嘅圍村,仲踩咗入梁志祥嘅地盤添!

棄譚投Ben 訊息遍傳

喺呢個兵荒馬亂嘅時候,草木皆兵,一封宣傳品隱藏嘅意義亦不容小覷,而民建聯不但高估咗佢哋嘅配票協調能力,仲低估咗支持者愛黨之情。話說有元朗嘅民建聯支持者見到有宣傳品從遠方跨區而來,就一廂情願以為呢封信係得到默許成功闖關,諗住大家一場兄弟,要守望相助,於是就紛紛表態,諗住幫吓呢個告急小兄弟一把,而呢個告急訊息仲一路傳、一路傳,由元朗傳到去天水圍,連屯門區嘅民記支持者都話要響應告急,棄投譚Sir轉投Ben添!

一封闖關宣傳信搞到民建聯新西配票大計失晒預算,而民記地區人士即時亡羊補牢,大呻要重新教育配票策略按原訂不變,不過支持者又點會聽得入耳吖,仲話配票咁麻煩,不如全投譚Sir就算啦!咁又唔得喎,咁咪即係之前嘅細心配票,前功盡廢?

推新宣傳 撥亂反正

幸好民建聯有豐富嘅選舉經驗,明知一人兩票嘅投票方法,市民一定一舊雲,於是就喺投票前發動新一輪宣傳攻勢,教自己友點投票,例如支持者係元朗嘅選民,就支持超級嘅劉江華同地區嘅梁志祥喇,其他唔使理咁多嘞。

新界西其他候選名單包括麥業成、梁耀忠、李永達、陳樹英、陳強、李卓人、曾健成、何君堯、陳一華、郭家麒、麥美娟、田北辰、陳偉業。

第一手消息請下載on.cc東方互動iPhone/iPad/Android/Windows Phone Apps