中環出更：鄧鉅明撐淡季先「一簽多行」
政府「急凍」深圳非戶籍居民「一簽多行」來港措施三周，尋日卓妮喺一個商場活動上遇到太子珠寶鐘錶主席鄧鉅明，佢坦言，如果一次過放咁多內地人來港，香港嘅交通同酒店業都會癱瘓。佢建議政府理性推行措施，如喺每年三至六月及九月零售業淡季時，有限度咁放寬內地旅客來港，既可促進本土經濟，又可避免混亂，達至雙贏。
財爺曾俊華預言本港零售業市道將會好嚴峻，鄧鉅明絕對認同，佢話公司主要以內地客為主，過去二十年內地樓市炒風熾熱，令社會出現唔少暴富，但近期樓市漸見泡沫，炒樓嘅人少咗、暴富漸減，「暴使」都少咗。鄧鉅明話，公司嘅高價貨營業額喺過去三個月急跌三成，好彩佢公司賣中價貨為主，仍然站得住腳。
項明生最想要隨意門
講番個活動，係紀念卡通「多啦A夢」誕生前一百年，鄧鉅明夫婦、鄧鉅明家姐朱鄧麗萍帶埋新抱彭慧玲（Ling），仲有Sony Computer Entertainment香港董事及總經理項明生（James）同「手套大王」詹氏第二代詹嘉莉都嚟湊熱鬧，佢哋童心未泯，爭住同多啦A夢公仔合照。James話，佢同表弟都係呢套漫畫嘅粉絲，最想擁有嘅法寶係「隨意門」，皆因James熱愛旅遊，如果一打開門就到彼邦，毋須搭飛機，你話幾好呢！
新抱幫朱鄧麗萍換look
卓妮見朱鄧麗萍一身運動裝打扮，戴上Y-3帽配風褸，充滿青春活力，原來係由Ling做佢形象顧問。Ling身上嘅D-Mop白雪公主T恤玩味十足，衫上嘅白雪公主竟然唔係着公主衫，而係着貼身襪褲。James件衫則充滿民族風味，原來係購自明星陳冠希建立嘅品牌Clot。
卓妮