殺人放火金腰帶，鋪橋搭路冇屍骸，呢兩句係點解o架？意思就係話，做壞事有得賞，做好事冇命享。呢嗱嗱嗱，香港大學最近就頒咗一條「金腰帶」畀前食衞局局長周一嶽，賞佢做一個名譽大學院士，幾鬼死巴閉呀！
所以話啫，喺香港做官真係好着數o架，冇政績又可以升職，冇貢獻又可以加薪，冇廉潔更加可以逍遙法外。好似貪遍海陸空嘅前特首曾蔭權咁吖，貪到最後一分鐘拍拍屁股走人，口口聲聲話調查嘅廉署至今未有正式行動。至於周一嶽咯喎，身為貪曾頭號打手嘅佢，在任八年劣迹斑斑，醫療失誤頻頻，知法犯法僭建，居然可以得到香港大學錦上添花，你想話唔係惡有善報都唔得啦！
未落台滾蛋之前周周孭一鑊嘅周一嶽，何解稱為頭號打手呢？即係咁，周一鑊轄下部門餐餐以「接獲投訴」作為藉口打壓東方報業集團，原因無非係不擇手段箝制正義傳媒嘅新聞自由。舉兩個例吖，○五年《太陽報》刊登一則宣傳「眼科靈眼藥水」嘅廣告，衞生署以違反《不良醫藥廣告條例》為名悍然檢控，結果《太陽報》獲判無罪。同年《東方日報》刊登一則醫療廣告，亦被同樣名義檢控，結果係撤銷傳票。兩報最終得還清白，證明檢控十分無厘頭，根本缺乏足夠理據，衞生署顯然係為打壓而打壓。
東方報業民意調查顯示，對於衞生署多次檢控東方違反《不良醫藥廣告條例》，同一則醫藥廣告喺其他報章刊登又冇檢控，三成九受訪者直斥執法不公平，存在雙重標準；兩成六認為有違法律精神須向東方交代因由；兩成覺得係針對式選擇性檢控。
唔止衞生署玩針對o架，周一鑊當時轄下嘅食環署都有滋擾東方。食環署三個月內兩次巡查東方員工餐廳廚房衞生，兩次都冇發現問題，兩成九受訪者認為本末倒置，食環署冇將人手用於處理關乎公眾利益嘅投訴；兩成八覺得係濫用權力。
周一鑊當時轄下仲有一個控煙辦，呢一個部門離譜到兩度直闖東方搞搞震，不過次次都搵唔到有人違例吸煙。三成受訪者指摘控煙辦不務正業，浪費人手；兩成九質疑當局借題發揮，滋擾報館；兩成三認為係刻意針對東方。
其他調查結果，都唔同大家長氣嘞，功夫茶必須指出嘅一點就係，唔理你係咪殺人放火金腰帶，肩負第四權監察政府任務嘅正義傳媒係唔會向「嶽勢力」低頭嘅，以前唔會，現在唔會，以後都唔會！
毋畏毋懼，為民喉舌，東方由始至終捍衞公眾知情權，愈打壓愈精神，睇下邊個怕邊個吖！