政情：盧偉國學後生仔 畫畫造勢
立法會工程界四人混戰結果好快揭盅，被指係「梁粉」嘅盧偉國（WK）除咗喺競選政綱入面力銷薪火相傳，暗寸對手何鍾泰（Raymond）做咗八年都唔肯將議席讓畀其他有識之士外，佢尋日仲喺造勢大會上學後生仔玩art jamming爭取支持。WK話自己從來都無諗過以畫畫方法表達對香港未來嘅訴求，順道大讚年輕工程師為業界注入新思維。
對於Raymond同另一對手公民黨黎廣德之間有秘密過票協定，會最後關頭「過票」支持勝算較高者，WK尋日就話如果真係有人配票嘅話會覺得痛心喎。
喺上次工程師學會論壇上，Raymond同黎廣德兩人不斷攻擊WK，搞到佢忙於應付，WK就好大方咁話如果對手集中火力對付佢一個，即係證明佢嘅競選工程做得唔錯喎。界別仲有候選人陸宏廣。