政情：新東混戰 葉偉明：我至急
距離立法會選舉投票日仲有不足一個星期，候選名單最多嘅新界東選舉氣氛詭異，建制派候選人個個都告急，搞到啲支持者都唔知邊個真係急。工聯會葉偉明、公民力量龐愛蘭以及民建聯葛珮帆（EQ）同陳克勤，個個近日都話自己選情險峻，到底信邊個先好呀？
葉偉明尋日話，民調顯示自己支持度一直喺當選同落選間徘徊，加上唔少人都覬覦工聯會嘅選票，不時放風話佢贏梗，仲吹到佢有六萬票添，所以希望班工友咪聽人亂講，兩票投晒工聯會喎。佢仲笑言，個個告急，或者會抵銷咗效用，但自己有責任畀工友知道邊個真正危危乎。
至於EQ，尋日同一班將軍澳居民同埋詠春師傅，去灣仔警察總部打詠春防狼術請願，要求升格將軍澳為獨立警區。佢表明會持樂觀態度看待選舉結果，嚟緊會穩住地區工作，因為自知好難叫克勤過票畀佢。新界東嘅候選名單仲有張超雄、田北俊、陳志全、劉慧卿、黃成智、蔡耀昌、范國威、湯家驊、梁國雄、邱榮光、何民傑、梁安琪、方國珊、陳國強同龐一鳴。