政情：頌言兩月大 已學「煲冬瓜」
莘莘學子今日開學，香港爸媽都好緊張仔女嘅學業。莎莎女婿陳振邦（Davis）係城中「潮爸」，囝囝陳頌言只得四、五個月大，雖然今日唔使開學，但已跟埋爸爸上普通話、英文同音樂班。
初為人父嘅Davis好錫ＢＢ，晚上盡量減少應酬返屋企湊仔。雖然家中傭人一大堆，但講到上ＢＢ班Playgroup，Davis一定親力親為。佢話，頌言兩個月大已開始抱佢上堂，眨眼已學咗兩個月。不過，ＢＢ仔連字母都未識齊，咁早學「煲冬瓜」同英文，到底明唔明呢？Davis就話，老師上堂時會以各種圖像及聲音刺激ＢＢ嘅感官，例如教佢哋認識人體五官，好玩又有趣，大人陪上堂都唔覺悶。
咁用心良苦，有原因嘅。Davis早前聽著名鋼琴家郎朗音樂會，對郎爸爸苦心栽培兒子為之感動，所以自己都唔懶得，希望阿仔將來成才，好似郎朗咁醒喎。