政情：港島選情 掛鈎超級議席
立法會選舉進入最後衝刺階段，尋日係「超級星期天」，各黨都把握機會拉票。喺港島區，現時民調仲落後工聯會王國興兩個百分點嘅民建聯鍾樹根，尋日直接踩入北角和富中心搞造勢大會，仲請埋二百幾名福建幫撐場晒冷。但心水清嘅人都知，當區區議員正是工聯會嘅人，似乎鍾樹根擺明車馬向王國興挑戰。不過鍾樹根否認踩場，話當區不嬲都係民建聯嘅支持者為主，仲預計佢同王國興只要各搶三萬票，大家就可以雙雙當選。
實情有無鍾根講得咁理想？有人就分析話二人選情甚至同超級議席嘅選情掛鈎。
事緣民建聯派出劉江華同李慧琼出戰超級議席，而工聯會就派出票后陳婉嫻，除非吸票力超強嘅嫻姐願意過票畀李慧琼，否則五個議席中建制派要三人全勝係極之困難。嫻姐尋日仲好堅決，話工聯會一票不能少，唔會過票畀李慧琼。嫻姐雖然係咁講，但到咗「柯打」一落，工聯會好難托手(月爭)說不，所以工聯會最終會過票畀李慧琼，只係多少嘅問題。
嫻姐過票都想有回報
有地區人士分析，工聯會唔會無條件過票，過票之餘都想有所回報。所以有人估計工聯會會利用嫻姐嘅超級選票做籌碼，利誘民建聯喺港島讓票畀王國興。該名地區人士話，超級議員嘅含金量，始終高過一名普通立法會議員，所以對民建聯嚟講，都係非常值得，而且大家唔好忘記，民建聯創黨主席曾鈺成一直視李慧琼為愛徒，一定會加把勁幫佢。
鍾根地區工作做咗廿幾年，行到今日，拉票毫不鬆懈，尋日佢踩入工聯會地盤搶票，仲要叫晒班福建幫頭目到場，包括楊孫西、施子清、洪祖杭等，擺明晒冷顯示實力。事後鍾樹根話畀傳媒聽佢同王國興二人皆可當選，呢個如意算盤可唔可以打響，佢係咪過分樂觀，下個禮拜就知。港島區嘅候選名單仲有單仲偕、葉劉淑儀、劉健儀、劉嘉鴻、陳家洛、何秀蘭、吳文遠、勞永樂、許清安、吳榮春、何家泰。
此外，尋晚有消息傳出，藝人謝霆鋒同汪明荃都支持李慧琼，曾志偉就推薦民建聯兩名超級候選人。