中環出更：陳君宜農圃食晏講潮經
時尚購物網站ZEUZ.COM創辦人陳君宜（Qinnie），自嫁予富商老公鄭躬明後，唔恨做少奶奶，寧願靠「食力」開店，實現夢想。網站開業短短十個月已收支平衡，仲交到唔少好友，好似農圃飯店董事關淑儀（Tina），就係忠實粉絲，兩人早前相約喺農圃食晏，講衫講鞋講扮靚，樂在其中。
開網店無加租壓力
Qinnie潮流觸覺快人一步，嚟緊十月將起程去巴黎、米蘭及倫敦睇時裝騷，大舉入新貨，佢坦言每季購入逾千萬元貨，金額不菲，要落足眼力至得。近年商舖狂加租，慶幸開網店無加租壓力，擴充話咁易。Qinnie諗頭多，嚟緊將考慮與鐘錶界美女胡敏珊合作，引入年輕品牌手錶喺網站賣，又會粉墨登場上銀幕做主持，分享最潮心得。
講番農圃，向來係名人聚腳地，早前增添新股東Tina。原來佢同老公幫襯農圃十幾年，本身經營五金及汽車零件生意，知道大股東有意出讓部分股份，於是一嘗做食肆老闆娘滋味。農圃嘅糯米釀雞翼係招牌菜，Qinnie都係捧場客之一。