中環出更：東華馬會奠基 安老拍住上
隨住人口老化，長者服務係香港未來好重要嘅課題。東華三院早喺四十年前已經成立首間位於黃竹坑嘅戴麟趾安老院，嗰度居高臨下，綠草如茵，真係令人心曠神怡，但見建築物開始老化，決定夥拍賽馬會慈善信託基金，重建成全港最大、樓高九層嘅安老院，預計一五年投入服務。東華主席陳文綺慧（Viola）話，新安老綜合中心取名「松朗」，係希望長者好似松柏咁長壽，天天都開朗。賽馬會董事周永健笑稱，自己都合資格入住，問Viola可唔可以畀佢攞定申請表先喎！
安老院前日舉行奠基典禮，政務司司長林鄭月娥、勞工及福利局局長張建宗等齊齊主持，當日時晴時雨，地盤水浸又撇雨，但無阻東華一班兄弟姊妹撐場。Viola姍姍來遲，原來佢上晝已經出席咗五、六個活動，真係魄力驚人。卓妮見Viola愈嚟愈瘦，真係我見猶憐，Viola都話好想增肥，可惜食極唔長肉，事關佢連食飯都忙住工作。
馬陳家歡孖囡囡影大肚寫真
卓妮見到腹大便便嘅副主席馬陳家歡（Katherine）都喺度，原來佢身兼社會服務委員會主任委員，非常關心重建計劃，唔怪得預產期仲有三周，都堅持要親身到場支持。時興影大肚寫真，已經有一個愛女嘅Katherine話，要彌補上次佗女時冇影寫真嘅遺憾，仲拖埋兩歲幾嘅囡囡一齊影。Katherine今次佗龍仔，湊夠個「好」字，佢已幫B仔改名做「Hanz」，意思係上帝嘅禮物。
卓妮