係人都知天水圍係悲情城市，但究竟點樣悲情，好多人知其然而不知其所以然，睇怕只有該區居民至有切身體會。呢，唔好講其他，淨係以買餸嚟講，以基層市民為主嘅天水圍居然貴絕全港，比百萬富翁最多嘅灣仔區仲要貴得多，你話夠唔夠悲情？夠唔夠荒謬吖？
點解會咁？答案好簡單啫，咪就係因為商業設施不足，加上領匯等財團壟斷，缺乏競爭囉。其實，天水圍居民長期被迫買貴餸、捱貴貨，早就怨聲載道，一直要求當局增加商業設施，引入競爭，只不過前朝政府闊佬懶理，關人個關。咁又難怪嘅，煲呔曾視民望如浮雲，成日傍住富豪黐飲黐食，周遊列國，又點會緊張天水圍居民嘅悲情吖。
好嘞，新政府知道「民生無小事」，終於肯正視問題，計劃斥資一千萬將天水圍北一幅三萬幾平方呎嘅空地發展為跳蚤市場，提供二百個檔位，交畀東華三院以社企形式運作，每個檔位月租八百到一千蚊，主要售賣日用品及蔬菜等，部分預計可以喺農曆新年前開業。
話時話，喺天水圍設跳蚤市場，一可以方便該區居民，二可以創造就業機會，三可以增加競爭降低物價，四可以帶動該區經濟，簡直係一舉數得，早就應該咁做喇。正所謂，遲到好過無到，社會各界早就有類似嘅提議，淨係功夫茶都講過N咁多次，奈何前朝政府詐傻扮懵，你畀個良心佢就當狗肺。新班子從善如流，撥亂反正，遲係遲啲，但總算令人見到佢哋求變嘅決心，天水圍居民終於望到喇。
講開又講，港府當年打造天水圍新市鎮，本來規劃可以容納五十萬人口，係一個有工業區、社區設施、商場、公共空間同埋休憩地帶嘅社區，點知最後為咗配合「八萬五」大計而趕工，粗製濫造，七除八扣，好多社區設施根本冇兌現到，卒之變成一個天殘地缺嘅悲情城市。事實證明，施政假大空真係害人害物。錢鍾書名作《圍城》有句名言：「城裏的人想出去，城外的人想進去。」可惜呢座「天水圍城」令人望而生畏，想出去嘅人多，想進去嘅人睇怕就唔會好多喇。
悲情城市嘅故事教訓港府，發展新市鎮唔只要全面規劃，配套齊全，仲要貫徹始終，講到做到。嗱，發展新界東北又係一個大計劃，引起好大爭議，搞到滿城風雨，究竟可唔可以落實，依家仲係未知之數，但如果日後真係落實，最緊要做好規劃及配套，唔好重蹈天水圍城嘅覆轍吖！