政情：陳恒鑌告急要跨區宣傳
民建聯喺今次立法會選舉新界東、西共派出五張名單出戰，大部分已經開始告急。以新界東為例，候選人陳克勤尋日喺鄉議局副主席張學明陪同下，殺入大埔林村多條村拜票，但大埔鄉事委員會主席文春輝都有掛經濟動力排頭參選，學明今次擺明為搶票邊個都冇面畀。
新界西嘅陳恒鑌（Ben）名單亦告急，該黨新界西有三隊參選，阿Ben獲分配荃灣、葵青、東涌等區，而另一隊嘅新界社團聯會會長梁志祥就主力爭取元朗同天水圍選票，大家河水不犯井水。不過有選民發現阿Ben嘅宣傳品寄咗去元朗嘅圍村，唔通佢告急告到唔理規定，夾硬跨區宣傳？
有民建聯核心成員解釋，跨區宣傳相信係支持民建聯嘅組織所為，可能對個別候選人有特別偏愛，強調該黨分區拉票策略未有改變，會盡力協調。至於梁志祥尋日就搵主席譚耀宗入元朗搞個交波儀式，睇嚟該黨真係好急喎。新界東候選名單仲有張超雄、田北俊、葉偉明、陳志全、劉慧卿、黃成智、蔡耀昌、范國威、湯家驊、葛珮帆、梁國雄、龐愛蘭、邱榮光、何民傑、梁安琪、方國珊、陳國強、龐一鳴。