政情：CY林鄭齊撐錦上路跳蚤市場
通常事業型女性未必能夠同時兼顧家庭事務，更何況係「好打得」嘅政務司司長林鄭月娥呢！話說尋日林鄭落區視察西鐵錦上路站外嘅跳蚤市場時，諗住買啲蔬菜消暑，點知勁多蝦碌，唔單止冇帶散紙，又冇帶環保袋，仲被檔主話佢太遲去買菜，靚嘢畀人買晒。
林鄭尋日繼續落區，去完天水圍視察區內嘅物價後，再到錦上路跳蚤市場嘅有機蔬菜店、單車舖同雜貨攤，了解檔主營商環境。當林鄭走過有機蔬菜店時，特別留意啲降暑嘅蔬菜。佢分別拿起啲秋葵、白花蛇舌草同白苦瓜嚟睇，仲大拋書包話秋葵有助降血糖，而白花蛇舌草就可以消熱祛濕。
林鄭諗住用四十元買上述蔬果，點知畀錢時先發覺銀包只有一百元紙幣，商販又話冇錢找，最後惟有幫襯買多幾條矮瓜湊夠五十元，等商販易找錢。另外特首梁振英（CY）同太太尋日下午亦到錦上路跳蚤市場參觀，最後買咗三十多元菠蘿及蜜糖以支持墟市發展。