政情：網民編歌《信錯白鴿》
民主黨（白鴿黨）一○年因為政改方案行入中聯辦「密室談判」傷透支持者嘅心，近日該黨又被揭發黨產不清、黨高層涉嫌漏報利益等連串醜聞，成個黨已腐爛變臭。立法會選舉在即，有熱心網民為提醒選民小心投票，將電影主題曲《那些年》改編成《那些年，我們一起信錯白鴿黨》，以歌詞唱衰白鴿黨喺「政改的法案，最重要時賣香港」，唔少網民聽到都感觸到一殼眼淚咁話。
對弱勢社群 「用完就揼」
《那些年，我們一起信錯白鴿黨》改編歌擺上網一日已經有過萬人次瀏覽，呢首歌可以話係講出咗唔少白鴿黨支持者嘅心聲，亦道出咗啲白鴿一當選即變臉嘅殘酷真相，就正如歌詞提到過去幾年喺唔少議案嘅表決都反映白鴿黨對弱勢社群係「用完就揼」。首歌嘅高潮位就係「明明話抗拒冇求和，然而與親中者同坐」，諷刺該黨喺政改方案表決時投贊成票賣港，所以最後幾句歌詞呼籲選民「保香港靠大眾手，白鴿黨要劏，理智，別上當」。
有網民留言話，白鴿黨「一方面話唔要西環治港，另一方面又入中聯辦秘密會談，出賣香港！」另一網民就批評「偽民主黨那班人廿多年來靠食六四老本，扮反對呃選民，還自我感覺良好。」大家異口同聲話，白鴿黨呃到佢哋一次，但呃唔到第二次，喺九月九日立法會選舉投票日誓要踢走白鴿黨。所次話呢，出得嚟行就預咗要還，選民眼睛係雪亮嘅。正如班網民話齋，班白鴿都係快啲去排定隊攞免費求職雜誌搵工罷啦！