中環出更：黃進達開發法國古堡遊
康泰旅行社太子爺黃進達（Jason）自小周遊列國，早已係「全球通」，為開發新旅遊路線，近期四出尋覓冷門線路。佢嘅最新發現，係法國中部遊，貪佢酒莊、古堡多，讓旅客換吓口味都唔錯。歐洲早前被熱浪侵襲，氣溫達四十幾度，Jason都失晒預算，到法國踩線期間，要頻頻行入商場歎冷氣消暑，認真搞笑。
法國中部特色景點多，Jason與同事去到有「法國花園」之稱嘅羅亞爾河流域（Loire Valley），該處有大大小小過百個城堡，當中以香波城堡（Chateau de Chambord）及雪濃梭古堡（Chenonceau）最具王者氣派。該處係法國貴族生活氣息最濃厚嘅地方，森林遍地，盛產葡萄酒，早已被法國人視為國寶。
中部酒莊雲集
Jason話，城堡遊極有賣點，事關近期歐元回落，遊英國、法國最抵玩，但齋遊巴黎Shopping已了無新意，所以落足眼力開發新景點，尤其睇中法國中部酒莊雲集，啱晒識飲識食嘅香港人喎。