中環出更：名人之後獲頒時尚專業女性獎
子女青出於藍係每個父母樂見嘅事，尋日香港科技大學校董會主席張建東（Marvin）大女張學欣（Jennifer）、大家樂集團主席陳裕光幼女陳浩寧（Candice）、保良局主席梁寶珠愛女林玉茵（Maya）等名人之後，獲頒「全港時尚專業女性選舉」獎項，以成績答謝父母嘅循循善誘教導。得獎嘅仲有IT界才女李煥明及香港青年聯會常務會董鄭詩韻（Michelle）等。
本身係會計師嘅Jennifer，倣效父母積極參與社會事務。Marvin話，佢自己讀書十三科全紅，冇科合格嘅「佳績」，女兒一定超越唔到，不如放手畀個女自由發展好過，但係成績可以唔計較，照顧就不能疏忽，所以當年一發現有咗學欣，張生就要求太太做全職媽咪，難得張太亦好同意老公嘅教育方式，對女兒同樣抱着開放態度，教出今日獨當一面嘅學欣。
陳裕光冇優待囡囡
至於Candice就多謝注重身教嘅父母，現時做室內設計師嘅佢，從無錢來伸手這回事，唔止家族旗下餐廳要入標先可以投得工程，連帶公司租金，爸爸陳裕光都一樣冇打折頭，所以依家囡囡養到七個員工，陳生直言好安慰。至於做人方面，陳太話佢哋嘅教育方式比較傳統，事事有規有矩。觀乎浩寧嘅老爺奶奶特登喺南非返嚟幫佢慶祝生日兼出席頒獎禮，就知陳太幾有功勞喇！
Maya就有婆婆撐場，年過八十嘅婆婆頭腦清晰，時事投資樣樣通，所以自小就受到婆婆薰陶，乖孫都視婆婆為偶像。同樣得獎嘅仲有Michelle，身為兩子之母嘅佢，仲要兼顧工作同社會服務，好彩從事家族生意嘅老公肯幫佢分擔照顧囝囝，難怪佢話要好好報答老公喇。
卓妮