小巴候車處擺位騎呢
「個站頭放正喺十字路口位，左、右各一條斑馬線，中間就係禁止車輛停留區，小巴喺嗰度上落客真係好危險！」陳先生發現長沙灣道與東京街交界設有一個專線小巴候車處，認為該處車輛流量高，質疑運輸署批准擺放小巴站牌並不恰當。
運輸署發言人解釋，有關標誌僅為指示牌，指示市民前往距離上址約數十米、位於東京街之小巴候車站，由於指示牌上的標誌及字體因脫色而變得模糊，已要求營辦商盡快修補或移走，以免誤導市民。發言人強調，其後再派員到場視察，證實指示牌經已被移走。「明明寫咗係候車處，識字嘅冇理由睇唔明，完全唔係指示牌，運輸署分明就係講大話！」陳先生又指有關站牌並無脫色痕迹，要求當局「說實話，幹實事」，而非以謊話掩飾過失。