好嘢！「膠津」撥亂反正，「膠官」終於清醒！
乜嘢係膠津？咪就係鼓勵就業交通津貼計劃囉，本來簡稱「交津」，後來變咗「膠津」。原因都唔使功夫茶解釋啦，呢個所謂鼓勵就業措施僵化到無朋友，成舊硬膠咁唔識轉彎，審查門檻又高又難，搞到大批基層打工仔被拒諸門外，你話咁嘅津貼計劃係咪硬膠到極吖！
咁膠官又指邊個呢？當然係將交津搞到變膠津嘅港產官僚啦，做嘢死估估，心腸冷冰冰，唔畀市民剷到飛起至奇。嗱，勞工及福利局局長張建宗終於覺今是而昨非嘞，決定放寬膠津……唔係……係放寬交津計劃嘅資產審查門檻，原本只係容許以家庭單位申請，家陣容許以家庭或個人申請都得，即係實行俗稱嘅雙軌制，估計多數萬打工仔受惠。
嗱嗱嗱，你話前朝曾蔭權政府幾咁荒謬吖，明明交津雙軌制實際可行，明明可以畀多幾萬個基層打工仔受惠，但就偏偏死都唔肯做。所以話，貪曾何止係硬膠，簡直係鐵石心腸，冷血刻薄！
新政府登場後從善如流，對交津政策撥亂反正，遲到總好過無到啦。張建宗係咁講嘅，交津改行雙軌制，並非打倒昨日嘅我，而係現屆政府希望做實事，回應市民，關心基層，當新一屆立法會十月復會之後，就會馬上提交審批落實。
開講有話，唔理黑貓白貓，捉到老鼠就係好貓。張建宗係咪打倒昨日嘅我，市民唔介意，最緊要新措施可唔可以幫到貧苦大眾嘅啫。即係咁，放寬交津申請無疑係好事，但係對基層係咪就足夠呢？譬如話，家陣交津金額係六百蚊，係咪可以順便檢討埋呢？你知啦，香港交通費又貴，唔少基層打工仔住得又偏遠，山長水遠跨區工作，淨係交通費已經去咗一大橛，你話點樣養家吖？又點樣鼓勵就業吖？唔好忘記，如果交津計劃無助鼓勵就業，就算放寬申請都係嘥氣o架咋！
歸根究柢，要幫助偏遠地區居民，交通津貼只係治標，當區就業至可以治本。點解當局唔開動腦筋，為悲情城市天水圍一類偏遠地區創造多啲就業機會呢？一來貧苦大眾唔使舟車勞頓、早出晚歸咁辛苦，二來咯喎，無謂變相將公帑奉獻畀啲交通機構吖嘛，貪曾就話醉心官商勾結啫，新政府唔需要蕭規曹隨喎！
一句講晒，交津撥亂反正，扶貧仍需努力。交津申請改用雙軌制，只係踏出正確第一步，扶貧工作唔可以就此行人止步，唔該港產官僚快快摒除以前嘅硬膠思維，全盤解決貧窮問題。