名不副實，得到手嘅都被人窒！
港大日前公布頒授名譽大學院士銜予九位人士，令人驚嚇的是——前食物及衞生局局長周一鑊竟然榜上有名？老朽以為自己眼花，在吐露港高速公路見到「鋁板警察」，難道頒獎名單都有鋁板？
周一鑊在任局長時，醫療事故鑊鑊新鮮鑊鑊甘；喺佢領導下，多少冤魂不息討不回公道，前線醫護人員過着非人生活，掀起公院醫護逃亡潮，講真，佢如果有半分「良心」、「良知」，又有乜顏面接受呢個名譽院士銜呢？
港大喺新聞稿話「名譽院士銜」係頒畀傑出人士；之不過，周一鑊係「杰撻達」個「杰」，完全係史家司馬遷筆下嘅「害於政，妨百姓」嘅庸官，咁嘅「傑出人士」，令人懷疑呢個銜頭，究竟有幾多含金量？
本報「政情」版質疑：喺周一鑊嘅名譽院士簡介，亦只係話佢參與過社會工作同推動殘疾人士體育運動發展，好難說服公眾佢有任何貢獻，加上早期其寓所被揭圍封僭建醜聞，真係唔知點解頒個名譽院士銜畀佢。
唉，一個年薪幾百萬嘅高官，任內就得咁小學雞嘅「功績」，講出嚟自己都醜喇！台灣詩人余光中話佢首《鄉愁》，表達嘅原是淡淡的哀愁，但看到內地演員朗誦呢首領導人都欣賞嘅詩，總是激動，甚至淒厲，有樣板戲的風味，令佢好難為情。詩人有品味、有真性情，周一鑊當然冇咁嘅修養及內省，如果有，被提名都面紅過豬血喇，仲話上台領獎！