政府規定授勳評審委員會由政務司司長任主席，司長林鄭月娥向以鐵面無私見稱，淨睇呢點已畀市民好大信心。政府亦規定委員會入面要有行政會議成員，行政會議召集人林煥光、成員羅范椒芬、張震遠同李國章都加入委員會，個個做事都一絲不苟，令人期待。
舊人方面，除咗幾位官守成員外，基本法委員會副主任梁愛詩、前金管局總裁任志剛、前立法會議員劉千石繼續留任。新成員中就有盛傳會出任中央政策組全職顧問嘅嶺南大學校董會副主席高靜芝，高靜芝做過多個大型機構人事部主管，揀人有信心保證，肯定唔會亂咁嚟。另外，政府亦宣布委任前立法會議員李家祥接替已出任發展局局長陳茂波，出任法律援助服務局主席。