政情：「九天玄女」剿滅「黃蟲智」
民主黨黃成智早前發表嘅「剩女論」，話剩女為增加性伴侶，結果得罪好多女性，尋日就有約二十名婦女去咗黃成智位於上水清河邨嘅辦事處抗議，大鬧佢係「道德塔利班」，要求佢要公開道歉。到場抗議嘅其中九名婦女更上演街頭劇，扮演「九天玄女」要剿滅「黃蟲智」，九名「玄女」各持太極扇或長矛，耍起唔同門派嘅太極功夫，然後邊嗌「打死佢」，一邊追打手持「剩女」二字嘅「黃蟲智」。
示威者Sunny話，黃成智發表女性為咗有多啲性伴侶而做剩女嘅言論，帶有侮辱成分，令佢哋非常憤怒。佢仲話，唔排除會去選舉論壇狙擊黃成智，或者去信要求佢公開道歉。
呢班經網上召集去抗議嘅婦女喺製作示威牌同設計口號嘅質素都好高，但可惜未有查清黃成智辦事處嘅辦公時間就摸上門，搞到齣劇都唔知做畀邊個睇。