政情：良心白鴿狠摑鐵頭仁

三位資深良心黨員陳德明、楊錚及羅國強，佢哋封信洋洋灑灑千幾字，有節有理咁反駁鐵頭仁。三位黨員首先強調，佢哋投訴公民黨一直都係以個人身份進行，完全唔明點解鐵頭仁會話有機會令人誤會同白鴿黨有關。三人喺信中又強調，投訴公民黨係為咗爭公義，事關公民黨班政棍聲稱維護自由、民主、人權同法治，但去到選舉就竟然學人玩知法犯法，三位黨員義憤填膺，先至會去廉署同埋選管會投訴喎。

斥公民黨與白鴿對着幹

三位黨員又反駁鐵頭仁話佢哋投訴無理嘅言論，強調有冇道理唔係由鐵頭仁或者公民黨決定，而係由廉署、選管會同律政司決定，明寸鐵頭仁九唔搭八，仲話唔需要佢自行判斷添。不過，真正精彩嘅係封信嘅最後一段，佢哋狠批公民黨過去嘅所作所為，其實同白鴿黨南轅北轍，好似公民黨參加五區補選，事後更打出「好在仲有公民黨」做口號，之後白鴿黨支持政改方案，公民黨又打對台重申「寧願原地踏步」，擺明有心搞白鴿黨。

佢哋又話，公民黨唔做地區工作，亦不重視市民對菲傭居港權嘅強烈情緒，淨係靠明星效應空降新界西參選，明搶白鴿黨票，自私自利，打破泛民勢力平衡。雖然三位黨員好似客觀分析形勢畀鐵頭仁聽，但係以鐵頭仁同一班老鴿大佬心胸狹窄嘅往績睇，呢啲真知灼見最終都一定石沉大海，冇計啦，白鴿黨縱有好黨員，但領導層掩耳閉目大玩一言堂，相信選民喺嚟緊九號投票日會識得用選票懲罰呢班不思進取，食老本食足一世嘅政壇垃圾。