中環出更：老中青齊撐鐘錶界盛事
全球最大嘅香港鐘錶展將於下周三喺灣仔會展登場，為活動熱身嘅鐘錶設計比賽日前揭盅，業界名人齊現身頒獎禮，包括鐘錶業總會主席區宇凡及副主席高鼎國、香港錶廠商會會長黎衍橋（David）及太子珠寶鐘錶執董朱繼陶囝囝朱國良等。工業總會副主席劉展灝囝囝劉燊濤，亦現身力撐百分百本地設計嘅自家品牌天普時（Temporis），仲有香港首個陀飛輪腕錶品牌萬希泉（Memorigin）創辦人沈慧林，現場逼到水洩不通。
鐘錶界老行尊孫秉樞都有撐場，講起佢屋企被泰傭盜取幾十萬元金飾事件，佢當係破財擋災。原來孫太係虔誠基督徒，早前心血來潮搵番多年前去以色列朝聖時買落嘅頸鏈時，先至揭發家賊罪行。涉案泰傭已被炒魷，孫秉樞唔介意再請新泰傭，事關欣賞泰傭識講中文，煮嘢又好食！
卓妮轉頭又見到九龍錶行董事總經理黃錦成及孻女黃雅芝（Angie），今年適逢公司成立六十周年，黃錦成話會大搞活動慶祝，宣揚香港人打不死嘅精神。Angie係家族生意第三代後人，佢一手打造新腕錶品牌Jaz-ma，專攻年輕人市場。
時計變潮物
David啱啱接替卸任嘅前會長蘇永強，佢話鐘錶業受到手機具備時間功能嘅衝擊不減，業界惟有絞盡腦汁，將時計變身潮物。佢旗下品牌「浪西錶」今次亦有參賽，公司首席設計師黃定邦嘅燈膽包裝作品「燃點這一生」，玩味十足，榮獲公開組亞軍添！
卓妮