未入正題之前，功夫茶同大家講一個咸豐年代嘅歷史掌故。各位親愛嘅讀者，知唔知名聞中外嘅中環蘭桂坊有一個相當不雅嘅舊名？唔知就講畀大家知，十八世紀嘅時候當地叫做爛鬼坊，原因係洋人特別多，而且環境污糟邋遢。後來咯喎，因為爛鬼坊呢一個名實在唔好聽，所以衞道之士就改為今時今日嘅蘭桂坊，取其蘭桂騰芳之意，幾咁詩情畫意呀。
因乜解究要舊事重提呢？就咁，家陣老蘭愈來愈似回到過去，甚至有理由相信係衰過舊時，再次叫做爛鬼坊都唔算誇張，事關當地已經烏煙瘴氣得好交關。
呢嗱嗱嗱，《東方日報》同《太陽報》上個月一連兩日大篇幅報道過啦，記者揭發蘭桂坊大量治安不靖嘅問題。外國旅客必然到此一遊嘅老蘭，既有南亞裔黑幫入侵，引發黃毒偷搶開片爭地盤，亦有無恥之徒利用迷姦水「炸彈」蹂躪良家婦女，風化案之多令人聞之卻步心慌慌。喂，黃花閨女固然怕咗無色無味防不勝防嘅迷姦水，你估麻甩男子唔驚o架？萬一有個性取向異於常人嘅變態色魔四出狩獵，啱啱遇着剛剛撞到正，男人老狗迷迷糊糊失身好慘情o架！
報道出街之後，警方係就係曾經幾次高調出動，浩浩蕩蕩操去老蘭掃蕩。之但係可惜吖，掃蕩行動只係零零星星斷斷續續，並非可持續發展嘅洗太平地，黃毒黑問題早就死灰復燃。最近喎，更加出現大批高鐘北妹游走街頭覓食，專門勾搭色迷迷嘅洋漢。正如中西區區議員陳捷貴話齋，蘭桂坊係香港出名嘅旅遊景點，如今變得烏煙瘴氣，令東方之珠美譽受損。陳捷貴認為，警方應該持續性同針對性打擊不法分子，先至可以還香港一個旅客消費以及娛樂安全嘅好地方。
點先至叫做娛樂安全呢？最低限度無知少女飲醉酒都唔使怕淪為風化案受害者先吖。警方冇錯係推出咗新措施，一發現有醉到不省人事嘅俏嬌娃被挾走，會即刻截停一干人等，救走醉娃送院檢查。問題係，記者連日化身蒲友直擊警員救醉娃，發覺人流密集嘅老蘭仍然有不少漏網之魚避過警方法眼，有人將醉到四肢無力嘅少女帶去公園唔知搞邊科。
所以話啫，警方執法唔可以唔嚴，更加唔可以虎頭蛇尾o架，一來唔可以任由老蘭變回爛鬼坊，二來唔容許淫亂風氣累街坊。你知啦，如果一個正人君子走去蘭桂坊消遣都被誤會係色中餓鬼，嗰種感覺非常之咁難頂啫。仲有喎，若然正常嘅遊客唔敢以身犯險進入九反之地，旅遊業呢一碌經濟支柱容乜易崩塌o架！