為了打擊超速駕駛者、減低交通意外，警方以一萬元製作兩個「仿真度極高」的一比一鋁合金「鋁板警察」。初步計劃放置喺吐露港公路、屯門公路、粉嶺公路。
警方於○二及○四年推出過紙板警察，如今用鋁板，每個重約廿磅，可謂「升呢」，看來，同𡃁模升cup一樣可喜可賀！當然，有人又擔心「鋁板警察」會益咗啲偷鐵黨，事關偷個鋁板警察變賣，都值成六十蚊㗎；若然有人咁沙膽，屆時真漢子現身，睇怕唔使用大支胡椒噴霧，都可以將偷「鋁」者繩之以法，當為警方破案率急增建一功！
話時話，真警察唔現身捉快車，唔通佢哋有更重要嘅任務？去晒罪惡黑點？老朽好似又唔多覺喎，好似旅遊熱點嘅蘭桂坊，早排多咗不少強姦案，最近更是烏煙瘴氣，黃賭黑令人不安，連的士司機都當啲差人冇到，開天索價亂冚旗。呢呢呢，連九龍城公園竟然有無牌食檔賣酒聚賭，香港啲真差人究竟去咗邊？
香港要長治久安，睇怕當局真係要諗諗計！如果紙警察升呢變鋁板漢子，咁就天下太平，香港就唔係一本難讀嘅書喇！說回鋁板警察，老朽有個寓言，話說山路上，一汽車駛過路旁寺廟門，一小和尚高舉「回頭是岸」橫幅，大喊：施主看這裏！車內金毛隔窗大罵：傻仔！瞬即飛馳急轉彎而去。十秒後，碰撞慘叫墮落聲傳來。當晚禪房內，小和尚對住持說：師父，是否直接寫「前方橋樑已斷」好些？
要懲奸除惡，滅罪捉快車，警方宜「回頭是岸」——現真漢子本身，勿再惜肉如金！