William尋日好老實咁話，自己並非等唔切政府，而係覺得自己成功受聘嘅機會唔高，早兩三個星期前已轉咗去城市大學嘅能源與環境政策研究中心出任副研究總監。佢自言喺世界自然基金會做咗四、五年，因此當初申請做副局長時，已經遞信辭職，希望轉下新環境。等咗一排後發覺無乜消息，加上坊間傳言副局長似另有人選，所以佢打定輸數，開始搵第二份工，早排就正式轉職城大做能源經濟學專家。
無論為政府定係大學打工，William都係最關注能源政策問題。由於天然氣價格近年每年都以雙位數上升，估計本港兩間電力公司都喺未來日子大幅加價，所以建議政府快啲成立天然氣價格穩定基金，如果唔係好難降低兩電加幅。