立法會選舉去到衝刺階段，各候選人都用盡辦法作最後宣傳，其中一招叫做「名人效應」，藉住一啲知名度高嘅人士幫自己拉票。喺港島區出選嘅自由黨主席劉健儀近期大打告急牌，尋日終於搵咗全國人大常委范徐麗泰同婦協主席林貝聿嘉拍短片支持佢，兩位阿太喺政界同婦女界都有好高嘅地位，但對劉健儀選情有幾大幫助，要到開票嗰刻先知喇。
最近網上有條短片，係范太同佢老友林貝聿嘉力撐劉健儀，希望港島區嘅婦女都要支持佢喎。其中范太猛讚劉健儀勤力、負責任、又畀心機，最緊要係佢有誠信，識咗佢十幾年未見過佢講大話喎，好似寸緊某啲人咁。同區參選嘅仲有單仲偕、葉劉淑儀、劉嘉鴻、曾鈺成、鍾樹根、陳家洛、王國興、何秀蘭、吳文遠、勞永樂、許清安、吳榮春同何家泰名單。