政情：嫻姐被指過票激到震
立法會超級區議會議席選舉最後一席嘅競爭極之激烈，泛民同建制派候選人都有機會勝出，就喺呢個時候，突然有報道話工聯會呼籲佢哋喺九龍西嘅會員，過票畀民建聯候選人李慧琼（Starry）。工聯會候選人陳婉嫻尋日講起呢單嘢時嬲到七彩，強調絕無其事，佢會努力爭取選票，絕對唔會過票畀人。
嫻姐尋日拉埋工聯會新界西候選人麥美娟（Alice）扮車衣女工，到工廠大廈親手車咗件背心嚟着，順勢帶出要扶助本港成衣業，鼓勵本土設計師推出自己品牌嘅訊息。問到「過票民建聯」一事時，口若懸河嘅嫻姐即時嬲到面色鐵青，質疑有人冒認工聯會打電話叫班會員支持第二個，強調佢哋連冇派人參選嘅九龍西，都唔會推薦其他候選人，何況係有佢參選嘅超級議席呢？
除咗嫻姐疑似被「鎅票」，佢個「工友」Alice亦話，有人由農曆新年起，已經亂咁唱佢夠晒票，真係多得對方唔少。此外，工聯會尋日去信有線電視同選管會，投訴有線嘅選舉論壇主持唔公道，冇畀足夠時間各候選人回應。