政情：廖長江承諾唔做立會懶蟲
前中總立法會代表黃宜弘（Philip），被形容為立會「四大懶蟲」之一，少不免影響中總形象，今年終由身為大律師嘅港區人大代表廖長江（Martin）接棒，明眼人睇得出係想創一番新氣象。身為議會新丁嘅Martin知責任重大，承諾會更落力了解民情脈搏，盡力做好議員工作，並會以維護香港整體公眾利益為依歸，暗示自己唔會好似Philip咁懶散同一味保皇。
Martin當選後尋日首度聯同中總會長蔡冠深與傳媒聚會，難免要評論Philip過去十多年嘅議會表現。Martin為人厚道，非但冇對Philip落井下石，反而引述數據指Philip都有「六成」出席率。佢又話雖然唔會辭大律師份工做全職議員，亦無就自己嘅出席率或質詢動議數目訂出硬指標，不過佢承諾一定盡力做好本身工作，該支持就支持，該反對就反對。
對於自動當選嘅金融界吳亮星揚言或重組「早餐派」，Martin笑言「好少食早餐」，未必會加入任何組織。佢又首度談及對政府理財哲學嘅意見，強調支持審慎理財，不主張福利主義，亦不同意再派錢，希望善用財政儲備用於紓解民困同經濟發展方面喎。