政情：何鍾泰黎廣德夾計砌梁粉？

今屆立會選舉多個傳統功能界別掀起換人風潮，多名連任多屆同年紀有番咁上下嘅建制派議員，有啲自願棄選，有啲就疑似畀人勸退，令相關業界出現新氣象。但現年已過七十、前後做咗十幾年議員嘅何鍾泰，就打破上屆佢參選時嘅「最後一擊」承諾，令唔少上屆支持咗佢同期望換人好耐嘅政界同業界人士非常失望，質疑年輕人愈來愈多嘅工程界，係咪真係無新血？

近日有人向我哋踢爆一宗疑似選舉內幕，話何鍾泰同黎廣德喺選舉提名期結束前夕，即上月廿九日晚上，「前後腳」到灣仔某酒店出席飯局。黎廣德隨後喺截止提名前三小時遞交報名表，令人質疑呢個飯局並非偶然。業界更流傳曾經喺上屆立會選舉鬥到你死我活嘅何鍾泰同黎廣德，正破天荒協調配票，目標係讓其中一人喺呢場三方混戰中勝出，點都唔畀盧偉國當選。

否認其事 指遭抹黑

我哋就此問過兩名當事人，何鍾泰斷言絕冇其事，因為佢根本冇去過嗰間酒店，最近亦無同黎廣德食過飯，直指有關消息純屬抹黑，反證佢支持度領先其他候選人，相信類似抹黑行動會陸續有來。黎廣德亦都異口同聲話完全冇咁嘅事，強調當日佢正在參加反國民教育遊行，無可能分身同何鍾泰食飯，配票協調嘅講法亦係惡意抹黑，根本不存在。

盧偉國打告急牌

眾所周知盧偉國同何鍾泰都係建制派，過往支持開何鍾泰嘅親建制業界人士，好多都已轉為支持盧偉國，單對單估計盧偉國勝算較高。但加埋來自泛民嘅黎廣德之後，情況就又唔係咁講，黎廣德隨時會喺兩名建制派對手相爭下漁人得利，爆冷當選。據聞近日盧偉國已大打選舉告急牌，四出向業界拉票，至今已贏得有八個政府工程師工會同埋「工程匯」支持。但如果何鍾泰同黎廣德為求砌低盧偉國，與敵對陣營達成魔鬼協議配票，盧偉國就神仙都難救。工程界候選人仲有陸宏廣。