政情：中環出更：名流支持首屆台灣糕餅節
唔少港人到台灣旅行，必買鳳梨酥等糕餅。睇好港人為食嘅巨大商機，台灣知名餅家索性移師香港搞匯展，假佐敦裕華國貨舉行「第一屆國際台灣糕餅節」。一班城中名流日前齊去試食，包括裕華董事長余國春、佢家姐余小春、台北經濟文化辦事處處長朱曦、仁愛堂總理羅台秦及佢老公戴澤良等人。余小春話，今次咁多名牌餅店匯聚，要趁機試勻晒。余國春及朱曦就即時大啖高纖無糖鳳梨酥，健康得嚟又好味無法擋。
孫國華重視港人口味
因港客熱捧而聲名大噪嘅維格餅家董事長孫國華（Simon）當日都喺度，十年前佢睇好遊客生意，決定將麵包店轉型做手信店，結果策略成功，萬千遊客一去到台灣，就掛住買鳳梨酥做手信，帶動台灣業界商機無限，佢亦賺到盆滿缽滿，公司就嚟上市添！問佢有咩秘訣氹掂港人個胃，風趣嘅Simon夾雜住半鹹淡廣東話透露，佢經常親自來港探究港人口味，然後度身訂做。例如港人鍾意飲鴛鴦，就觸動佢將紅豆加入台灣傳統綠豆糕，變身為鴛鴦綠豆糕，結果同樣熱賣。
