政情：中環出更：梁太兩母女睇戲冇架子
由月前「應徵」做特首夫人，到依家做咗如假包換嘅第一夫人，梁唐青儀依然都係咁親民。話說卓妮前日喺ifc撞到梁太，佢同囡囡行孖咇睇戲，身邊無保鏢相陪，兩母女食完嘢睇完戲，再行時裝連鎖店，一啲架子都無。
仲有幾日，暑假就過去啦，唔少莘莘學子都準備開學，好似CY囡囡梁頌昕咁，好快都要返英國開學，所以前日梁太趁得閒，即刻同囡囡去行街睇戲，過番個親子下午。梁太同頌昕接近三點到達ifc，兩母女首先行去戲院旁嘅咖啡店食一個輕巧下午茶，再過隔籬搭電梯落戲院睇一級卡通片《荒失失奇兵3︰歐洲逐隻捉》，散場時兩母女有傾有講，唔知係咪仲回味緊劇情呢？食完嘢、又睇完戲，當然唔少得女人最鍾意嘅行街Shopping，兩母女入咗OL至愛嘅ZARA時裝店，不過似乎無咩斬獲，行咗一陣就出番嚟。
梁太之前畀人批評佢衣着打扮，前日見佢以泡泡袖鬆身衫配西褲，領部嘅藍色繡花搶眼得嚟又淡雅，難怪最近有人讚佢着衫好睇咗，難得梁太都唔介意畀人揶揄，仲好親切咁話覺得自己着衫一向都好睇，果然夠大方。
短褲示人吸引眼球
至於不時以短褲示人嘅頌昕，前日以黑色束腰上衣配白色短褲，青春無敵，落戲院嗰陣搞到喺側邊落緊電梯嘅兩個男生，都忍唔住轉身望多兩眼。
講開又講，頌昕手挽住依家非常流行嘅藍色Balenciaga city bag，名媛雷林靜怡、名模姚書軼，仲有賭王何鴻燊幼女何超欣都一人有一個，果然跟得上潮流。
卓妮