80後希望加建居屋
【本報訊】近期樓價急升，政府出招為樓市降溫，由「結婚等到仔都生埋」仍然未抽到居屋的八十後青年梁業鵬表示，最希望政府可以增建居屋，協助他們置業，解決住屋問題。
梁業鵬表示，他與妻子兩人的入息超過公屋入息上限，但申請居屋三、四年，仍買不到樓，眼見樓價愈升愈高，購買私樓肯定無望，他認為政府更改置安心資助房屋計劃是好事，但希望政府可以多做一步，加建居屋，「政府既然可以將工廈改建公屋，咁不如考慮下將工廈改建居屋出售，咁樣可以幫到我哋置業！」他打算明年初透過白表免補地價購買二手居屋，希望政府今次出招後，樓價可以平穩發展，二手居屋樓價不會再「係咁升」，令他可以成為業主。
政府宣布推出多項穩定樓價招數，不少網民均表示支持。網民小妍妍說：「好過唔做，其實政府都幾難做！推低樓市又驚啲葉（業）主上街，但唔郁佢又係咁炒升！」。網民ume則認為措施實際用途雖然不大，但相信可以為樓市降溫，「等啲市民唔好恐慌性入市！」。另有網民CanoninD則對政府抱有希望，預料有關招數會再陸續推出。