正所謂咯喎，行家一出手，便知有沒有。為人處世最好有自知之明，千祈唔好喺行家面前扮晒叉燒出洋相，魯班門前唔好弄大斧，華佗面前唔好亂刮骨。之但係偏偏有一單醫療事故，病人服務助理竟然喺一位經驗豐富嘅護士面前違反指引做事，人哋唔剷到你上天花板至奇啦！
事件發生於博愛醫院，八十四歲姓錢嘅伯伯入院治理，佢個寶貝女剛巧係服務公立醫院超過二十年嘅護士。身為護士嘅乖乖女送爸爸入院，梗係金睛火眼(目及)到實一實o架啦。好衰唔衰，真係畀佢(目及)到唔應該發生嘅事喎。錢女士憶述，六月三日晚探望父親嘅時候，親眼目睹一名男病人服務助理以胃管餵食之前，用左手撳住病人腹上部，並且打氣入胃測試胃管位置，錢女士即刻話：「你就係咁測試胃管？請你用正確方法。」
正確方法係點嘅呢？醫管局指引清楚列明，以胃管餵食之前先用針筒抽取胃管樣本，以酸鹼紙化驗，酸鹼值小於五點五即係胃液，證明胃管正在胃內，否則就係錯置。如果胃管處於錯誤位置而輸入營養液，病人好危險o架，有機會引致吸入性肺炎，攞命都有之。
錢女士六月五日晚再見到嚇人場面，病人服務助理冇用正確方法測試胃管位置，輸入奶汁之後五分鐘，錢伯伯面容扭曲又雙手擺動，口腔積滿白色液體。去到六月六日凌晨二時三十五分，錢伯伯因肺炎死亡。
呢嗱嗱嗱，你話係咪離譜吖？錢女士就質疑嘞：「當日離開醫院時，爸爸仲好精靈，點解病情變得咁快？」佢仲話：「原來醫管局訂定嘅指引係冇用，教人就一套，醫人就另一套，視人命如草芥，我都係護士，真係接受唔到！」
博愛醫院事後承認，病人服務助理違反指引，已暫停所有病人服務助理嘅胃管餵食工作，將個案轉介死因庭跟進。喂，人命關天，你估玩煮飯仔咩，胃管餵食係護理人員基本功，點可以咁兒戲o架！
唉，醫療事故沒完沒了，到底病人有冇保障o架？你知啦，頭暈身慶去公立醫院求診幾乎係中產階級納稅人唯一嘅福利，假如咁嘅所謂福利隨時要咗你條老命，納稅人死都唔眼閉啦。
點都好啦，麻煩新任食衞局局長高永文出盡飲奶之力，為沉疴未愈嘅醫療系統把把脈，從而妙手回春力挽狂瀾於既倒。係人手不足呢？係訓練唔夠呢？係指引模糊呢？定係乜嘢原因一次又一次害死病人呀？護理失當嘅結果係病人枉死，如果醫療官僚監管失職，再嚟一次沙士爆發之類，最終必然係香港滅亡！