民主黨（白鴿黨）近日醜聞纏身，繼主席何俊仁（鐵頭仁）被連番揭發漏報公司後，佢啲黨友又被爆涉嫌賄選。所以作為區議會超級議席嘅候選人，鐵頭仁出席論壇時，好容易就被對手篤正死穴。喺尋日一個論壇上送贈競選口號嘅環節，鐵頭仁嘅團隊雖然想乘機借民建聯劉江華嘅口號過橋，話民建聯要輸，望可以同工聯會嘅陳婉嫻攜手趕走民建聯，但立即遇到劉江華嘅反擊。
劉江華用番鐵頭仁嘅選舉競選口號「無畏強權，向不義挑戰，幾許風雨爭民主！」，質疑佢再冇提到「堅定可信」四字，係咪覺得自己已經唔再可信。劉江華又批評鐵頭仁聲稱要反對功能組別，但又支持設立超級區議會議席呢個功能組別，自己仲參加埋，立場極不堅定，加上不斷漏報擁有嘅公司資產，疏忽、唔記得、誠信問題樣樣齊，根本唔可信。
而喺尋晚播出嘅另一個電視台論壇中，鐵頭仁喺質詢劉江華認唔認同要拆除中聯辦外花槽嘅時候，被反質疑佢應該好熟悉中聯辦內外嘅環境，劉江華話佢之前曾經鬼鬼祟祟咁入過去談判。其他超級區議會議席嘅候選名單仲有李慧琼、涂謹申、馮檢基及白韻琹。