政情：傳他信2.8億買陳振聰楠樺居地皮
商人陳振聰自從輸咗官司後，一直有傳佢陷入財困，好彩佢仲有間超級半山大宅喺手。佢喺寶雲道十六號間楠樺居原址地盤一直被外界估價最少值四億元。但最近市場傳出有人以平價掃貨，而且買家仲係鼎鼎大名嘅泰國前總理他信，傳聞佢以兩億八千萬元買入塊地，如果真係成事，陳振聰就真係大幅割價求售嘞。
呢個消息傳出後，我哋即刻四出求證，到晚上差唔多十點先搵到陳振聰嘅細佬陳振國（Ricky）。Ricky好客氣咁同我哋講，塊地係放緊盤，近排亦有買家接洽，但未聽聞過個買家叫他信，至於現時傾個價錢係點，Ricky就話唔方便講。
尋日下晝三點幾，我哋見到陳振聰現身養和醫院，見佢同囡囡沿路有講有笑，就算發現我哋之後，都好有禮貌保持笑容，仲直接同我哋講話到醫院係為咗探望媽媽，講完拜拜後，佢就一個箭步入咗升降機。