政情：無家者義工做林鄭保鏢
無家者世界盃香港籌委會喺尋日嘅慈善賽籌到廿萬元，足夠代表隊八名隊員去墨西哥出席無家者世界盃。身兼扶貧委員會籌備小組副主席嘅政務司司長林鄭月娥致辭時賣口乖話，自己每次都會爭取出席同無家者或露宿者有關嘅活動，又透露近排同咗唔少團體開會聽意見，大大加深佢對本港貧窮問題嘅認識。
林鄭又大讚為無家者服務嘅志願機構才華橫溢，諗到用足球比賽呢個好主意重建無家者嘅信心同自尊心。
內地六個城市非當地居民「一簽多行」赴港個人遊計劃即將實施，記者喺活動結束後上前問林鄭新計劃會唔會對本港出入境部門造成壓力時，一班無家者世界盃義工即刻上前幫林鄭開路，仲起勢用手擋開一直追問嘅記者，令備受保護嘅林鄭全程淨係講咗「唔好意思，借借！」同埋「講咗啦！」幾個字。林鄭同無家者關係咁好，義工們出手為佢開路，連保鏢都做埋。