政情：發叔左右做人難
每逢選舉，新界鄉議局主席劉皇發嘅取態都有舉足輕重作用，皆因發叔做咗鄉議局主席幾十年，唔少鄉事委員會主席、甚至係村代表都習慣聽佢指示，先會決定支持邊個候選人，結果發叔就成為各方拉攏對象，個個都希望得到佢支持。今次立法會選舉，發叔面對嘅困難比以往更加複雜，由於佢今次堅決支持原居民自己派隊，結果受盡壓力，未到投票日已經兩面不是人。
鄉事派同民建聯喺今次選舉中各有自己支持嘅人選，以新界東為例，經濟動力邱榮光名單如果唔係得發叔喺背後發功推動，根本就唔可能成軍。係人都知，鄉事派自己出選，完全唔係建制派操盤人嘅計劃，結果發叔同埋一班鄉紳咪受盡壓力，時不時就畀人召去照肺囉，就好似前日邱榮光搞造勢大會咁，據聞發叔原本係會出席，但奈何極度有勢力人士執意阻撓，用各種藉口纏住發叔，令佢甩唔到身。
喺新界西，原本佢有心儀嘅人選，不過佢最終都要半推半就，支持咗民建聯嘅候選人。點解係咁？據聞因為已經進身行政會議嘅鄉議局副主席張學明，早前拉埋兩名民建聯候選人同發叔食咗餐飯，民建聯開到口尋求支持，發叔好難推。發叔喺新界西鄉郊仍然有好大影響力，有民建聯中人直言，如果冇發叔背書，大部分村代表都會渾身唔自在，箍票亦冇咁積極。因為咁，發叔今次企喺原居民一邊，壓力大到難以置信。
至於學明，佢就輕鬆得多嘞，皆因佢早就決定支持民建聯，即使明知有候選人係由鄉事派支持都好，佢都話唔撐就唔撐。
鄉事票左右選舉結果
鄉事票嘅流向，一向都可以左右選舉結果。鄉事派喺今次選舉，原本同民建聯對着幹，但大家都喺建制派嘅大家庭，到咗投票階段一定有人出嚟維持秩序，以免同票路嘅人拉散晒啲票，終於出現唔想見到嘅結果，於是選舉期間保持低調嘅發叔近來壓力爆煲，一班有自己主張嘅鄉委會主席亦不斷被操盤人照肺，新界東、西嘅選情未來十幾日仍然充滿變數。